Sheri Akabiliwa Nakifungo Chamiaka 450 Jela.

Tashella Sheri Amore Dickerson, Mkurugenzi Mtendaji wa Black Lives Matter Oklahoma City (BLM OKC), anakabiliwa na hatari ya kifungo kirefu kinachoweza kufikia miaka 450 gerezani endapo atapatikana na hatia katika mashtaka yanayomkabili.

Dickerson anashtakiwa kwa makosa 25 kwa jumla, yakiwemo makosa 20 ya utapeli wa mawasiliano (wire fraud) na makosa matano ya utakatishaji fedha (money laundering). Kisheria, kila kosa la wire fraud linaweza kuadhibiwa kwa hadi miaka 20 jela, huku kila kosa la money laundering likiwa na adhabu ya hadi miaka 10.

Hivyo basi, endapo mahakama itaamua kutoa adhabu ya juu kwa kila kosa na kuyaendesha mfululizo, jumla ya kifungo inaweza kufikia miaka 450 ingawa kivitendo, adhabu halisi inaweza kuwa ndogo kulingana na uamuzi wa mahakama, miongozo ya adhabu ya shirikisho, na ushahidi utakaozingatiwa.

Kwa mujibu wa waendesha mashtaka wa shirikisho, Dickerson anadaiwa kuelekeza angalau dola milioni 3.15 za michango na fedha za dhamana zilizorejeshwa kwenda kwenye akaunti zake binafsi, badala ya kutumika kwa malengo ya kijamii. Inadaiwa fedha hizo zilitumika kwa safari za kimataifa, manunuzi binafsi, ununuzi wa magari, na kupata mali isiyohamishika jijini Oklahoma.

Serikali pia inadai aliwasilisha taarifa za uongo kwa mdhamini wa kifedha wa shirika hilo, akionyesha fedha zimetumika kwa shughuli halali, huku matumizi binafsi yakifichwa.

Kesi hii imezua mjadala mpana kuhusu uwajibikaji wa kifedha ndani ya mashirika ya kijamii, ikionyesha kuwa hata harakati zinazojengwa juu ya haki na uadilifu haziwezi kuwa juu ya sheria.

Kwa sasa, Dickerson ameachiwa kwa dhamana na anasisitiza kuwa hana hatia, huku akisubiri mchakato kamili wa mahakama.